ألا سحقاً ..... للخمّة

ألا سحقاً ........ للخّمة

السلام عليكم حبايب قلبي .. شلونكم عساكم مرتاحين ؟

في موضوع كان ودي اتكلم فيه من زمان بس .. ما ودي أغث نفسي وأغثكم معاي .. بس شسوي لازم أقوله علشان افضفض ... وهم أكون ناقل خبرة يمكن تستفيدون منها ..

المهم موضوعي اليوم عن ناس .. ما لهم من الأسامي عندي إلا الخمة .. والخمة بالنسبة لي أنواع يعني في منهم اللي يتعمد يطلعك على خطأ مو علشان كلامك فعلاً خطأ لا يطلع خطأ علشان بعدين اذا قلت رايك الصريح فيه يقول عنك هذا انسان يخطأ على طول .. يعني تشويه سمعة فقط... هذا النوع الأول .

النوع الثاني يكون عادة إنسان شايف نفسة حيل حيل بدرجة مو طبيعية .. وتلقاه يتكلم بكل موضوع ويفهم بكل شي واذا طرحت إنت موضوع معين غصب طيب يحاول إنه يصحح فيه حتى لو كان خالي من العيوب .. يعيد صياغة موضوع علشان يكون بالصورة .. وبخبرتي بعلم النفس .. هذا إنسان فاضي من الداخل ويحاول إثبات وجود لا أكثر ولا أقل.

النوع الثالث هذا ما أدري شقول عنه .. إنسان بو شخصيتين .. يعني لما تكلمة بالنت تلقاه إنسان ولما تشوفه على الطبيعة تلقاه واحد ثاني .. شخصية طبيعية اللي اهو عليها وشخصية ثانية اللي بالنت .. واللي بالنت اهي غالباً ما تكون الشخصية اللي وده أنه يكون ( يعني بعلم النفس شخصية الأنا المثالي ) هذا ما منه خوف .. تلقاه ملسون بالنت وعلى الطبيعة ضعيف شخصية ولا يعرف يتكلم .. وعادة ردودة تكون مهزوزة .

النوع الثالث اهو النوع النذل (هههههههه) عجبتني وقاحتي هالمرة ... هذا انسان متطلب كثيراً يطلب منك وعلى كثر ما تعطية ما يبين بعينة وفوق كل هذا لما تسويله شي يجيك بعد مدة ويقول لك ان في شخص سواله نفس اللي سويت له بس الثاني أحسن منك ( جنه يقول ترا مالك فضل علي ) .. مثال علشان لا احد يخوره بالتفسير

احمد طلب مني اعطيه قلم وعطيته .. يرجع احمد ويقول لي ترا خالد عطاني قلم احسن من قلمك (شلون أحسن يعني يكتب بروحة مثلاً ؟؟ ) المهم الشخصية هذه فعلاً نذلة ونصيحتي إنك ما تجادلها لأنها دايماً بتطلع غلط .. أشتر راحتك .

النوع الرابع نوعية طيبة جداً جداً ملاك .. حبيب محترم .. فاهم دارس عاقل متفهم يقدر الآخرين متواضع ماكو أحسن منه. ما يغلط ... هذه طبعاً الصفات اللي يشوفها بنفسه .. والناس الثانية تشوفه على حقيقته طبعاً, هذا الانسان لازم انك توخر عنه بسرعة لأنه غالباً يضرك وهو حاط في باله انه يفيدك .. نظراً للأمور فوق تحت . غبي ويدعي الذكاء. مشكلة انه ما يدري إن الناس تشوفه على عكس اللي يشوف نفسه فيه .

النوع الخامس هم بعد حبيب وطيب ولما تشوفه بروحة تقول عنه ذهبه وخووش رجال ما يرد لك طلب وتحطه على يمناك .. مشكلته الوحيدة إنه يقعد مع الخمة والناس صعب تفرق بينه وبينهم وما ودك تحتك معاه لأنه الخمة اللي معاه راح يخلونه يكرهك أو يخلونك تكره .. لما يفج عن الخمة ويكون بروحة هذيك الساعة احتك فيه لأنه حبيب جداً .

النوع السادس نقاد وعنده كل شي مو زين حتى الاشياء اللي واضحة للعيان انها زينه , بس لأ دام انها مو عند أحد الناس اللي يشوفهم قدوة .. تكون مو زينة .. ماله داعي تتعب نفسك مع هالنوع من الخمة لانه الجدال عقيم وبيزنطي وما يجيب ضنى .

النوع السابع هذا نوع مليق وتافه يمشي ويقييم الناس ويسألك أسأله سخيفة وينقد على اجاباتك وما يشوفك بالعين شي , ويحاول يبين للكل إنه اهو أفضل واحد وفيه رؤية فوقية للناس بشكل مو طبيعي .. وما يعطي من نفسه كلشش .. ولما تشوف ماضيه تلقاه بدون ربع لزقة بالناس اللي وده يصير نفسهم بس اهم سافهينه لأنه مو كفو حشيمة. ويا كثر ما يتشيحط .. ماله حل إلا إنك تطقه وتخليه يجبي علشان اذا شافك مرة ثانية ينحاش .

النوع الثامن هو النوع اللي فيه منه واااجد وااااجد (بهات بهات) بالدواوين نوع مزعج وكل ما تقول موضوع وتخلص يعقب على موضوع ويا ليت يقول إنا سمعت ان كذا وكذا ..لا يقول إنا رايي بالموضوع ويجيب أمثلة من ـ ـ ـ ـ مخة .. طيب السالفة سالفتي والموضوع موضوع وانا طارحه من بابا إعطاء معلومة .. ماني ملزوم فيك وبرايك . .رايك خله لك واستريح شوي .. هالنوعية لازم تندقر ولا يتمادى.

النوع التاسع هالدايخ من أنواع الخمة مصيبة .. تلقاه يتكلم بالمواجيب والمرجلة وكل ما قالو الناس سالفة دخل فيها الرجولة والمرجلة والصح إن الواحد يسوي جذي (ومن المرجلة أن تقوم بكذا وكذا) ولما تبين موقف الرجولة الصجية تلقاه بعيد كل البعد عن الرجولة وما يشم ريحتها كلش .. هالنوعة غالباً ما تكون تسمع عن الرجولة وتقرا عنها أو حتى امه تسولف له عنها .. بس ما عمرة مارسها .

أخر نوع برأيي النوع العاشر وهو النوع اللي ينقال عنه المثل (يطرون من الحافي نعال) أو (ينطرون من الديج بيضة) أو (نقوله ثور ويقول أحلبه) هالنوع أذية ومشكلة بحد ذاته يحاول أن يستفيد من كل شي بقعدته .. يعني مثلاً اذا بتطلبون من مطعم واهو مو مشتيهه يحاول يطلع عيوب بالمطعم يخليك تكره المطعم علشان ما تطلب منه ويتدور مطعم على مشتاهته, الحال معه إنك تطلب اللي تبيه وتخليه يولي جنه مو موجود لأنه غثيث .. ولا تناقشة لانه مثل باجي الخمة راح يحاول بكل الطرق يطلعك غلطان.

في النهاية يا أخواني أتمنى إني ما غثيتكم .. ولو إني أنغيت بمجرد ما كتبت هالكلام .. بس أتمنى إني أكون وضحت لكم نظرتي للخمة واتمنى إنكم تستفيدون منها ... وقبل ما تتعاملون مع أي نوع من هالانواع أتمنى إنكم تتذكرون المثل اللي يقول

( الطيب ما يبين بالردي ) والمثل الثاني ( لا تجادل الأحمق فقد يختلف الناس بالتفريق بينكما ).

هذا رايي بالخمة واتمنى إن ما يطلع لي أحد ويقول انت شفهمك بالناس .. وليش ما ليش .. هذا رايي واتمنى إنه يحترم